Blog

KUNI AU UMEME? UTACHOMWA VIPI?

Kuna habari zilizosambaa kote kama moto ulioshika wenyewe na kuviviwa na upepo mkali wa kiangazi katikati ya msitu uliojaa majani makavu. Kumezuka mtindo mpya unaowashtua wengi. Kinyume na mila na desturi tulizo na uzoefu nazo huku kwetu, baadhi ya watu siku hizi wanateketeza maiti zao. Sasa mjadala umeibuka na kushika moto mitaani baada ya kufariki kwa watu kadhaa mashuhuri na miili yao kuchomwa. Inafahamika na wote kuwa tangu kitambo wanaojihusisha na shughuli ya kuteketeza marehemu wao ni wale wanaoshikilia itikadi ya Kihindu na baadhi ya wazungu, kwetu ni jambo la karaha. Jambo geni na limewaacha wengi vinywa wazi.

 

Juzi nilikuwa na malumbano makali yanayoangazia mada hii hii. Ofisini niko na sahibu wangu mmoja anayeunga mkono itikadi hii geni. Aliniaeleza kuwa yeye hana tatizo na uteketezaji wa maiti na kusisitiza kuwa eti hata sisi waafrika zamani tulikwa hatuzikani. Tabia ya kuzika ililetwa na wazungu na waislamu. Mtu akifa alikuwa anachukuliwa na kutupwa msituni aliwe na wanyama wa porini. Loh! Ni kudhalilisha maiti kulioje! Tabia ya kuzika haikuwepo zamani za kale, alishikilia.  Mimi nikamwambia basi hata hiyo ya kuchoma si yetu asli yake ni ya mabaniani na baadhi ya wazungu. Hapo ndio ikawa ni kama nimeongeza mafuta ndani ya moto, akaruka na kuniambia hakuna makosa ya kuchoma eti pia inasaidia kuhifadhi mazingira. Loh vipi? Nikiwa bado nimepigwa na butwaa alizidi kunirushia manufaa ya kuchoma maiti…eti ni haraka na haina gharama kubwa na jivu la aliyeunguzwa uhifadhiwa ndani ya chombo na huwa eti ni rahisi kubebwa na kugawiwa jamaa wa karibu wa marehemu.

 

 

Ninavyojuwa mimi itikadi hii ni kinyume na maadili ya dini za familia nyingi hapa nchini na duniani kote. Kuchoma kunafanya iwe vigumu kwa waliofiwa kuomboleza. Kuzika kunafanya iwe rahisi kwa familia kuzuru kaburi, kumkumbuka na kumuombea mwendazake. Waislamu wanaamini kuwa maiti anastahili kushughulikiwa kwa uangalifu kwa vile anahisi uchungu pia, ata kuoshwa hivyo basi kumchoma maiti ni swala ambalo haliko kamwe. Ni adhabu kubwa sana kwa aliyekufa.

CHAKULA SI CHAKULA TENA!

unnamed (1)

CHAKULA SI CHAKULA TENA!

Nani anayekumbuka maankuli yalivyokuwa zamani? Nikitafakari udogoni wetu tulikuwa tunakula vyakula halisi vyenye ladha na afya…ugali uliosongwa kwa unga wa mahindi yaliyosagwa nyumbani kwa kinu cha kuzungushwa kwa mkono, ukionja sukuma wiki ulihisi unakula mboga za majani mabichi yaliyojaa afya tele, mchuzi ulipokaangwa na kuwekwa nyanya uliipata harufu halisi ya nyanya ukiwa nje ya nyumba, nyama ya ng’ombe yenye ladha ya kutamanisha unapoitafuna kisha tuliteremsha mlo kama huo kwa maziwa ya mtindi matamu ya kukupa sifa kamili. Asubuhi wakati wa kupata kiamsha kinywa, Mama alipotukaangia mayai ladha yake ilikuwa nzuri hata sijawahi kuipata tena ladha kama hiyo.

Samaki hazivuliwi tu katika Ziwa la Victoria pekee, bali kuna zile zinazotoka Uchina…hatuna uhakika ni samaki au ni vitu vilivyotayarishwa kiwandani na kuundwa kama samaki! Maana Wachina wana ubunifu wa hali ya juu. Kuku siku hizi hudungwa sindano za kemikali ya kuzifurisha ili wanunuzi waone kuwa ni kubwa. Hali ya nyama sasa ndio ya kutamausha kabisa, ili zionekane kuwa sawa kwa muda mrefu bila kuoza huwa zapakwa kemikali hatari ya sulphite ambayo yasemekana pia inayotumiwa kuhifadhi maiti. Kemikali hizi zina madhara chungu nzima kwa watu!

Mayai pia hali yake haieleweki kamwe. Mboga zanyunyizwa kemikali za sumu ili kuua wadudu na kuzifanya zipevuke upesi ndio zipate kuwasilishwa sokoni haraka ili wauzaji watengeze faida yao bila ya  kujali madhara kwa wanaadamu wenzao. Habari za Sukari sote twakumbuka ilipogunduliwa kuwa na mercury kisha mabwenyenye wahusika walikamatwa na hatimaye kama kawaida, habari hizo zikafifia na hatujazisikia tena. Kweli nchi yetu ina magwiji wa ufisadi. Maji ya kunywa yanayohifadhiwa chupani almaarufu ‘Mineral Water’ pia yamezusha purukushani baadhi yakisemekana kuwa ni maji tu ya kawaida ya bomba yaliyobandikwa chapa za kuvutia na kuuzwa kama maji safi ya kistaarabu!

Ulafi na kupapia utajiri kutoka kwa baadhi yetu unatufanya tuchanganyikiwe tusitambue nini cha kuliwa.